عمران خان جو تعلق مديني جي رياست نه پر سوويت يونين سان آهي: احسن اقبال

قومي اسيمبليءَ جي اجلاس ۾ مخالف ڌر پاران وزيراعظم عمران خان تي سخت تنقيد ڪئي وئي، ن ليگ اڳواڻ احسن اقبال جو چوڻ آهي ته عمران خان جو تعلق مديني جي رياست نه پر سوويت يونين سان آهي، هو پاڪستان جو گورباچوف آحي، حڪمران هر محاذ تي ناڪام ٿي ويا آهن،کنڊ چورن کي بچائڻ لاءِ سموري انڊسٽريءَ کي چور بڻايو ويو آهي، هڪ جهاز ڪريش ٿيڻ تي سموري ايوي ايشن انڊسٽريءَ کي داءُ تي لڳايو ويو، پ پ جي نفيسه شاهه چيو ته اساما بن لادن کي شهيد قرار ڏيڻ وڏي غلطي آهي.
قومي اسيمبليءَ جو اجلاس اسپيڪر اسد قيصر جي صدارت هيٺ ٿيو، جنهن دوران مخالف ڌر وزيراعظم عمران خان تنقيد جا تيز وسايا.
ن ليگ اڳواڻ احسن اقبال چيو ته وزيراعظم عمران خان چوي ٿو سندس بيانن ۾ تضاد ناهي، قرض نه وٺڻ جو چيو ويو، پر هنن وڌيڪ قرض ورتا، ننڍي ڪابينا جي دعويٰ ڪندڙ جي وزيرن ۽ صلاحڪار جي فوج آهي.
هن چيو ته حڪومت هر محاذ تي ناڪام ٿي آهي، وزيراعظم جي تقرير سان ڪنهن جو پيٽ ناهي ڀرجندو نه ئي ملڪ هلندو آهي.
احسن اقبال چيو ته عمران خان مديني جي رياست جو مثال ڏيندو آهي پر هو مديني جي رياست نه پر سوويت يونين جو ماڊل آهي آهي، عمران خان پاڪستان جو گورباچوف آهي.
ن ليگ اڳواڻ چيو ته عمران خان جو مقصد رڳو وزيراعظم بڻجڻ هو، ٿي ته ويو پر وٽس ڪو پلان ناهي، چيو ويندو آهي ته ڪپتان ديانتدار آهي سندس صلاحڪار سٺا ناهن، پر هو چوندو ته ڪپتان پاڻ نااهل ۽ نالائق آهي.
پ پ ايم اين اي نفيسه شاهه چيو ته وزيراعظم کي جرمني ۽ جاپان ۾ فرق جي ناهي عمران خان جي بيان سان پاڪستان جي ساک متاثر ٿي.
هن چيو ته هوابازي واري وزير جهاز حادثي جي رپورٽ پيش ڪندي چيو ته 800 پائليٽن مان 290 پائليٽن جا لائسنس جعلي آهن هو غلام سرور خان کان استعيفيٰ جو مطالبو ڪن ٿا.
نفيسه شاهه چيو ته وزيراعظم عمران خان اسامه بن لادن کي شهيد قرار ڏنو، جنهن سان انٽرنيشنل ميڊيا ۾ گهڻيون هيڊلائنز ٺهيون، جيڪڏهن سندس زبان ترڪي وئي ته به اها وڏي غلطي آهي.
پ پ ايم اين اي چيو ته هڪ وزير چوي ٿي ته ڪورونا جا 19 قسم هوندا آهن، جنهن تي اسپيڪر کيس چيو ته اوهان سياسي تقرير ڪري رهيا آهيو.
نفيسه شاهه چيو ته نه هوءَ ڪابينا جي ڪارڪردگي جي ڳالهه پئي ڪري، وزير عوام کي ڪهڙو ميسيج ڏئي رهيا آهن.
اسپيڪر نفيسه شاهه کي ڳالهائڻ کان روڪي ڇڏيو، جنهن تي هن احتجاج ڪيو.
وفاقي وزير علي محمد خان ڳالهائيندي چيو ته اڙهين ترميم جا جتي فائدا آهن، اتي ڪجهه نقصان به آهن، ترميم بعد زرعي پيداوار ۾ ست سيڪڙو گهٽتائي ٿي.
هن چيو ته سياحت جو شعبو پاڪستان جي تقدير تبديل ڪري سگهي ٿو…