توانائي واري صوبائي وزير امتياز شيخ مخالف ڌر اڳواڻ کان معافي جو مطالبو ڪري ڇڏيو

توانائي واري صوبائي وزير امتياز شيخ مخالف ڌر اڳواڻ کان معافي جو مطالبو ڪري ڇڏيو، سندس چوڻ آهي ته مخالف ڌر جي اڳواڻ فردوس شميم صوبائي حڪومت ختم ڪري گورنر راڄ جو مطالبو ڪيو، جيڪا شرم جوڳي ڳالهه آهي، کيس اهڙي تي سنڌ جي ماڻهن کان معافي وٺڻ گهرجي.
سنڌ اسيمبليءَ جي اجلاس کي خطاب ڪندي امتياز شيخ چيو ته سنڌ حڪومت پنهنجي صوبي جي ملازمن ۾ ڏهه سيڪڙو واڌ ڪري بهترين بجيٽ پيش ڪئي آهي.
هن چيو ته هتي ڪجهه ميمبر ٻين صوبن جي اسپتالن جون تصويرون کڻي ڏيکارن ٿا ته سنڌ جون اسپتالن جي حالت خراب آهي، ٿي سگهي ٿو اهي پراڻا فوٽو هجن.
توانائي واري وزير چيو ته جيڪي نان وائبل اسڪول بند ڪيا ويا آهن انهن جون تصويرون ڏيکاريون وڃن ٿيون، شهباز گل هڪ اسپتال جي پراڻي بلڊنگ وٽ بيهي فوٽو ڪڍرايا جيڪا شرم جهڙي ڳالهه آهي.
امتياز شيخ چيو ته سنڌ حڪومت صوبي ۾ روڊن جو ڄار وڇائي ڇڏيو آهي پر پو۽ به هي پراڻا فوٽو کڻي بيهن ٿا.
صوبائي وزير چيو ته ارڙهين ترميم سبب صوبن کي خودمختياري ملي پر هنن کان اها ڳالهه برداشت نه پئي ٿئي، ارڙهين ترميم کي ختم ڪرڻ هنن جي وس کان ٻاهر آهي.
صوبائي وزير چيو ته ڇهن پارٽين جي اتحاد سان آيل حڪومت مشڪل ۾ اچڻ واري آهي، شهريار مهر به وفاق تي تنقيد ڪئي مطلب اها اتحادي پارٽي به وڃڻ واري آهي.