سڌ سماءَ واري وفاقي وزير شبلي فراز چيو آهي ته لاڪ ڊائون تي گوڙ ڪندڙن جا اربين رپيا ٻاهر پيا آهن

سڌ سماءَ واري وفاقي وزير شبلي فراز چيو آهي ته لاڪ ڊائون تي گوڙ ڪندڙن جا اربين رپيا ٻاهر پيا آهن، مخالف ڌر رڳو تنقيد ڪندي آهي، ڪڏهن ڪا بهتر تجويز ناهي ڏني.
وفاقي ڪابينا جي اجلاس کانپوءِ ميڊيا کي بريفنگ ڏيندي شبلي فراز چيو ته وزيراعظم عمران خان اٽي جي اگهه ۾ اضافي تي ڳڻتي جو اظهار ڪيو آهي.
هن چيو ته وزيراعظم، پيٽرول ۽ ڊيزل جو معيار يورو فائيو تائين وڌائڻ جي منظوري ڏني، جڏهن ته کنڊ جي اگهن تي عمل ٽن مهينن اندر ٿيندو.
شبلي فراز چيو ته پاڪستان ۾ صحت جي نظام تي ڌيان نه ڏنو ويو، پر وزيراعظم ان کي درست ڪرڻ لاءِ پرعزم آهي، کين صحت جو نظام ٺيڪ ڪرڻو آهي.
هن چيو ته اسد عمر ۽ ڊاڪٽر ظفر مرزا ڪابينا کي ڪورونا وائرس بابت بريفنگ ڏني.
شبلي فراز چيو ته ڪڻڪ جي سمگلنگ روڪڻ سميت ان جي طريقڪار کي شفاف بڻائڻ لاءِ قدم کنيا پيا وڃن، اٽي جي اگهه ضابطو آڻڻ لاءِ پنجاب کي 9 لک ٽن ڪڻڪ رليز ڪرڻ لاءِ چيو آهي.
وفاقي وزير چيو ته کنڊ ٺاهڻ جي عمل کي شفاف بڻائڻ ضروري آهي.
شبلي فراز چيو ته ڪورونا وبا کي بهتر نموني منهن ڏنو پيو وڃي، اگسٽ تائين وبا جي پکيڙ خطرناڪ هوندي، شهري ايس او پيز تي عمل ڪن.
وفاقي وزير چيو ته لاڪ ڊائون بابت وزيراعظم عمران خان بهتر ڪيو، حڪومت جو مقابلو انهن مافيائن سان آهي، جيڪي هر موقعي جي ڳولا ۾ هونديون آهن.
شبلي فراز چيو ته وزيراعظم عمران خان جو سڀ ڪجهه پاڪستان ۾ آهي، هو هر وقت ملڪ جو سوچي رهيو آهي.
سڌ سماءَ واري وزير چيو ته فواد چوڌري جي انٽرويو تي به ڪابينا اجلاس ۾ ڳالهه ٿي، وزيراعظم چيو ته پارٽيءَ ۾ اتحاد هجڻ ضروري آهي، زرتاج گل چونڊجي آئي آهي، زبان ترڪي وئي، غلطي ٿي ويندي آهي، کين درگذر ڪرڻ گهرجي.