سعودي حڪومت ڪورونا وائرس سبب هلندڙ سال حج محدود ڪرڻ جو اعلان ڪري ڇڏيو آهي.

سعودي عرب جي حج ۽ عمري جي وزارت طرفان جاري ڪيل بيان ۾ چيو ويو آهي ته ڪورونا وائرس سبب حج ڪندڙن جو تعداد محدود رکڻ جو فيصلو ڪيو ويو آهي.
بيان ۾ چيو ويو آهي ته سعودي عرب ۾ آباد مختلف ملڪن جا شهري به حج ڪري سگهندا ۽ حج دوران حفاظتي قدمن کي يقيني بڻايو ويندو.
حج دوران حاجي سڳورن جي سلامتي کي يقيني بڻائڻ لاءِ سماجي وٿي کي برقرار رکيو ويندو ته جيئن انساني تحفظ بابت اسلامي شريعت جا مقصد پورا ٿي سگهن.
بيان موجب سڄي دنيا ۾ ڪورونا وائرس جي وبا جي پکيڙ ۽ ويڪسين جي عدم دستيابي سبب حج ۾ شرڪت ڪندڙن جو تعداد محدود رکيو ويندو جنهن سان حج دوران پانڌيئرن ۾ سماجي وٿي برقرار رکڻ ۾ مدد ملي سگهندي.
حج وزارت طرفان جاري ڪيل بيان ۾ چيو ويو آهي ته وبا جي شروعات کان حرمين شريفين ايندڙ پانڌيئڙن جي صحت ۽ سلامتي يقيني بڻائڻ سندن پهرين ترجيح رهي آهي.
هن چيو ته مقدس هنڌن کي پانڌيئڙن لاءِ محفوظ بڻائڻ بابت اڳ عمري جي پانڌيئڙن تي پابندي لاڳو ڪئي وئي هئي.
سندس چوڻ هو ته ڪيترن ئي اسلامي ۽ عالمي تنظيمن وبا جي پکيڙ محدود رکڻ لاءِ سندن قدمن جو اعتراف ڪيو آهي.
ترجمان موجب وبا جي پکيڙ جي صورتحال کي نظر ۾ رکندي هلندڙ سال حج کي محدود ڪرڻ جو فيصلو ڪيو ويو آهي.
هر سال اسلام جي اهم رڪن حج جي ادائيگي لاءِ لکين مسلمان سعودي عرب ۾ مڪي شريف ۽ مديني شريف جو سفر ڪندا آهن، گذريل سال 25 لک ماڻهن حج جو فرض ادا ڪيو.
حج بابت سعودي حڪومت طرفان ڪنهن به آخري اعلان ۾ دير سبب انڊونيشيا پهريون ئي پنهنجي شهرين کي حج ۾ شرڪت کان روڪي ڇڏيو هو.
ڪورونا وائرس جي پکيڙ سبب سعودي حڪومت فيبروري ۾ ئي عمري تي پابندي لڳائي چڪي آهي.
ٽن مهينن تائين هلندڙ لاڪ ڊائون جي خاتمي باوجود عمري جي ادائيگي تي پابندي لڳائي وئي آهي.