ناليوارو عالم دين ۽ شيعه اڳواڻ علامه طالب جوهري لاڏاڻو ڪري ويو.

علامه طالب جوهري 81 ورهين جي ڄمار ۾ ڪراچي جي خانگي اسپتال ۾ دم ڌڻي حوالي ڪيو.
علامه طالب جوهري جو لاش اسپتال کان انچولي امام بارگاهه منتقل ڪيو ويو.
علامه طالب جوهري جي جنازي نماز اڄ انچولي امام بارگاهه ويجهو گرائونڊ ۾ ادا ڪرڻ بعد سندس مڙهه رضويه سوسائٽي ۾ علامه طالب جوهري لائبريري جي اڱڻ ۾ مٽيءَ ماءُ حوالي ڪيو ويندو.
ناليوارو عالم دين علامه طالب جوهري 27 آگسٽ 1939 ۾ ڀارت جي شهر پٽنا ۾ پيدا ٿيو، سندس والد مشهور عالم دين علامه مصطفيٰ خان هو.
ناليوارو عالم دين طالب جوهري 1949 ۾ پاڪستان آيو ۽ 1955 ۾ تعليم حاصل ڪرڻ لاءِ عراق ويو.
تعليم حاصل ڪرڻ بعد طالب جوهري ڪراچيءَ جي ناظم آباد ڪاليج ۾ ليڪچرار مقرر ٿيو هو.
طالب جوهري جامعه اماميه جو پرسنل به رهيو.
علامه طالب جوهري کي ڪيترن ئي سالن کان پاڪستاني عالمن ۾ مرڪزي حيثيت حاصل هئي.
ڪراچيءَ جي نشتر پارڪ ۾ شام غريبان جي مجلس سان سندس شهر ڏيهه توڙي پرڏيهه ۾ پکڙجي وئي.
ناليواري عالم دين علامه طالب جوهري ڪيترائي ڪتاب لکيا جن ۾ قرآن شريف جو تفسير ۽ شاعري به ڪئي.
علامه طالب جوهري جي شاعري جا ٽي ڪتاب به ڇپجي چڪا آهن.
صدر عارف علوي، وزيراعظم عمران خان، صوبائي وزير سعيد غني، صوبائي وزير امتياز شيخ، پ پ اڳواڻ رحمان ملڪ، جي ڊي اي جو ترجمان سردار رحيم، پي ٽي آءِ اڳواڻ علي زيدي، علامه شهنشاهه حسين نقوي، علامه راجا ناصر عباس ۽ ٻين پاران علامه طالب جوهري جي لاڏاڻي تي سندس وارثن سان ڏک جو اظهار ڪيو آهي.