صحت جي عالمي اداري ڊبليو ايڇ او پاڪستان ۾ لاڪ ڊائون ۾ نرميءَ تي ڳڻتي جو اظهار ڪندي صورتحال کي خطرناڪ قرار ڏئي ڇڏيو

صحت جي عالمي اداري ڊبليو ايڇ او پاڪستان ۾ لاڪ ڊائون ۾ نرميءَ تي ڳڻتي جو اظهار ڪندي صورتحال کي خطرناڪ قرار ڏئي ڇڏيو، پنجاب حڪومت کي لکيل خط ۾ چيو ويو آهي ته پهرين ۽ 22 مئي تي پابنديون ان وقت هٽايون ويون جڏهن ملڪ ان فيصلي جي بنيادي گهرجن تي پورو نه پيو لهيَ، لاڪ ڊائون ۾ نرميءَ سان ڪورونا وائرس پکڙجڻ ۾ تيزي آئي، پاڪستان وبا جي پکيڙ روڪڻ لاءِ متاثر علائقن ۾ ٻه هفتا مڪمل لاڪ ڊائون وقت جي ضرورت آهي، روزاني 50 هزار ٽيسٽون ڪرڻ جي پاليسي اختيار ڪرڻي پوندي، ملڪ ۾ ٽيسٽ هاڪاري اچڻ جي شرح 24 سيڪڙو تمام گهڻي آهي.
صحت جي عالمي اداري ملڪ ۾ ڪورونا وائرس جي وڌندڙ ڪيسن ۽ موتن تي خطري جي گهنٽي وڄائي ڇڏي.
ڊبليو ايڇ او پاران پنجاب حڪومت کي لکيل خط ۾ موقف اختيار ڪيو ويو آهي ته پاڪستان ۾ ڪورونا وائرس جو پهريون مريض هلندڙ سال 26 فيبروري تي ظاهر ٿيو، پاڪستان جي وڏن شهرن ۾ ڪورونا وائرس جا ڪيس وڏي انگ ۾ آهن.
ڊبليو ايڇ او تجويز ڏني آهي ته پاڪستان سمورا احتياطي اپاءَ اختيار ڪري، آئسوليشن، سماجي وٿي ۽ ڪانٽيڪٽ ٽريسنگ لاءِ قدم کنيا وڃن.
خط جي متن ۾ موقف اختيار ڪيو ويو ته پاڪستان لاءِ روزاني 50 هزار ٽيسٽ جي اهليت اختيار ڪرڻ تمام گهڻو ضروري آهي، لاڪ ڊائون ختم ڪرڻ لاءِ حڪومت پاران 6 شرط پورا ڪرڻ ضروري آهن.
ڊبليو ايڇ او موجب لاڪ ڊائون ختم ڪرڻ کان اڳ حڪومت يقيني بڻائي ته ملڪ ۾ وبا مڪمل ڪنٽرول ۾ آهي.
خط ۾ چيو ويو ته هيلٿ سسٽم هر ڪيس جي سڃاڻپ، ٽيسٽ، آئسوليشن، علاج ۽ ٽريس ڪرڻ جو اهل هجي، حڪومت يقيني بڻائي ته هاٽ اسپاٽ رسڪس گهٽ ٿي سگهن.
ڊبليو ايڇ او طرفان لکيل خط ۾ وڌيڪ چيو ويو ته پاڪستان هن وقت لاڪ ڊائون ختم ڪرڻ جي معيار تي پورو نه ٿو لهي، پاڪستان ڪورونا سبب متاثر ٿيل 10 مٿين ملڪن ۾ شامل آهي.
صحت جي عالمي اداري جي تجويز آهي ته پاڪستان ٻه هفتا لاڪ ڊائون ۽ ٻه هفتا نرمي جي پاليسي اختيار ڪري.