سپريم ڪورٽ، ملڪ ۾ ڪورونا وائرس جا ڪيس وڌڻ بعد ڇنڇر ۽ آچر تي مارڪيٽ کولڻ وارو حڪم واپس وٺي ڇڏيو آهي

سپريم ڪورٽ، ملڪ ۾ ڪورونا وائرس جا ڪيس وڌڻ بعد ڇنڇر ۽ آچر تي مارڪيٽ کولڻ وارو حڪم واپس وٺي ڇڏيو آهي، عدالت رمارڪس ڏنا ته ڪورونا وائرس کان تحفظ لاءِ قانونسازي ٿيڻ گهرجي، پريس ڪانفرنسن ذريعي ماڻهن جي حياتين جو تحفظ نه ٿيندو.
ڪورونا وائرس پاڻمرادي نوٽيس ڪيس جي چيف جسٽس گلزار احمد جي سربراهيءَ ۾ چار رڪني بئنچ ٻڌڻي ڪئي.
ٻڌڻي دوران چيف جسٽس گلزار احمد رمارڪس ڏنا ته حڪومت اڃا تائين ڪورونا وائرس کان تحفظ لاءِ قانونسازي ناهي ڪئي، جنهن تي اٽارني جنرل چيو ته صوبن طرفان قانون سازي ڪئي وئي آهي.
چيف جسٽس رمارڪس ڏنا ته قومي سطح تي به ڪورونا وائرس جي تحفظ لاءِ قانون سازي ٿيڻ گهرجي، قومي سطح تي قانون سازي سڄي ملڪ ۾ لاڳو ٿيندي.
جسٽس گلزار احمد چيو ته ملڪ جا سمورا ادارا ڪم ڪري سگهن ٿا ته پارليامينٽ ڇو نٿي ڪري سگهي؟
هن چيو ته پريس ڪانفرنسن ذريعي ماڻهن جي حياتيون جو تحفظ نه ٿيندو.
جسٽس اعجاز الاحسن چيو ته خبر ناهي ته ڪورونا وائرس جي مريضن جو انگ ڪيترو ٿيندو.
هن چيو ته وائرس ڪنهن به صوبي ۾ فرق نه ٿو ڪري هر هنڌ ماڻهو ماري رهيو آهي، وفاقي سرڪار ڪورونا کان بچاءُ لاءِ قانونسازي ڪري.
چيف جسٽس رمارڪس ڏنا ته قانون سازي بابت اڃا تائين ڪجهه به ناهي ٿيو، چين وبا کي منهن ڏيڻ لاءِ فوري طور قانون ٺاهيا.
جسٽس گلزار احمد چيو ته عدالت ماڻهن جي بنيادي حقن جي ڳالهه ڪري رهي آهي، زندگيءَ جو تحفظ سڀ کان وڏو بنيادي حق آهي، موجوده حالتن ۾ ماڻهن جون حياتيون خطري ۾ آهن.
جسٽس اعجاز الاحسن رمارڪس ڏنا ته وقت سڀ کان وڏو اثاثو آهي، اهو ڪنهن جو به انتظار ناهي ڪندو، اسان وٽ وڌيڪ وقت ناهي رهيو.
اٽارني جنرل عدالت کي چيو ته حڪومت کي قانونسازي جي تجويز ڏني ويندي.
چيف جسٽس چيو ته هو به ڪورونا وائرس جي شدت محسوس ڪري رهيا آهن.
جسٽس اعجاز الاحسن ڊاڪٽرن کي حفاظتي سامان هر حال ۾ دستياب هجڻ گهرجي.
جسٽس مظاهر علي اڪبر نقوي چيو ته وفاقي وزير سرڪار جي ذميواري وڌيڪ آهي، وائرس کان تحفظ جو حل قانونسازي آهي.
جسٽس اعجاز الاحسن چيو ته حفاظتي سامان نه هجڻ سان نقصان ٿيو ته اهو ڀرجي نه سگهندو.
سپريم ڪورٽ، وفاقي سرڪار کي ڪورونا وائرس کان بچاءُ لاءِ قدم کڻڻ جو حڪم ڏيندي پاڻمرادي نوٽيس جي ٻڌڻي ٻن هفتن لاءِ ملتوي ڪري ڇڏي………