پيپلزپارٽيءَ جي نائب صدر سينيٽر شيري رحمان وزيراعظم عمران خان جي خطاب کي قوم سان مذاق قرار ڏنو آهي

پيپلزپارٽيءَ جي نائب صدر سينيٽر شيري رحمان وزيراعظم عمران خان جي خطاب کي قوم سان مذاق قرار ڏنو آهي، سندس چوڻ آهي ته وزيراعظم عمران خان کي خبر هئي ته لاڪ ڊائون ختم ڪرڻ سان وائرس پکڙجندو ته ان کي ختم ڇو ڪيو ويو؟
جاري ڪيل وڊيو بيان ۾ شيري رحمان چيو ته جيڪڏهن وفاقي سرڪار ڪورونا وائرس کي پکڙجڻ کان روڪي نه ٿي سگهي ته پوءِ حڪومت جو ڪهڙو ڪم آهي؟
شيري رحمان چيو ته عمران خان ڏکئي وقت ۾ عوام جون حياتيون بچائڻ بدران شرم ناڪ حد تائين پنهنجي ضد تي بيٺل آهن.
پ پ سينيٽر چيو ته وزيراعظم جي بيان سان عوام وقت مايوسيءَ جو شڪار ٿيو، ٽائيگر فورس کي ڪورونا جو ٽاسڪ ڏيڻ کِل جوڳو ۽ طبي عملي جي خدمتن کان نابري وارڻ آهي، ٽائيگر فورس جي ڪا به قانوني حيثيت ناهي، عمران خان کي ڊاڪٽرن ۽ طبي عملي جو ڪو به احساس ناهي.
شيري رحمان چيو ته عمران خان هڪ طرف وائرس سبب ماڻهو فوت ٿيڻ جا تفصيل ٻڌائي پيو، ٻئي پاسي الله جو شڪر ادا پيو ڪري.
پ پ سينيٽر چيو ته عمران خان وضاحت ڪري ته ڇا ٽائيگر فورس ملڪ ۾ قانون لاڳو ڪندڙ ادارن جو مبتال آهي؟ پاڻ ايس او پيز تي عمل نه ڪري وزيراعظم ڪهڙي منهن سان عوام کي احتياطي اپائن تي عمل جو چئي رهيو آهي؟