مسلم ليگ ن جي ترجمان مريم اورنگزيب چيو آهي ته کنڊ اسڪينڊل ۾ وزيراعظم عمران خان کي بچائڻ لاءِ شهباز شريف جي نالي جي پرچي شامل ڪئي وئي آهي. کنڊ اسڪينڊل جي جاچ ڪندڙ ڪميشن جي رپورٽ تي مريم اورنگزيب چيو ته ڪميشن قائم ڪرڻ ۽ رپورٽ شايع ڪرڻ عمران خان کي بچائڻ لا3 هڪ سرڪس ۽ نوٽنڪي آهي، اصل کنڊ چور عمران خان جو رپورٽ مان نالو خارج ڪرڻ سان سندس ڏوهه ثابت ٿي ويو آهي. هن چيو ته وزيراعظم عمران خان کنڊ جي سبسڊي، ٻاهر موڪلڻ ۽ اگهه وڌائڻ جي اجازت ڏني پوءِ کين ڪميشن ۾ ڇو طلب نه ڪيو ويو؟سندس چوڻ هو ته عمران خان ۽ عثمان بوزدار کي کنڊ چوريءَ جي فيصلن جي منظوري ڏيڻ جي گڏجاڻي ڇو ياد ناهي، کنڊ چوري جي فيصلن جي منظوري عمران خان ۽ بوزدار ڏني ۽ ڪرپشن وري شريف خاندان جي ملن ڪئي؟ جيڪڏهن نواز شريف وزيراعظم طور قانون سامهون پيش اچي سگهي ٿو ته کنڊ چور عمران خان ڇو نه؟ مريم اورنگزيب چيو ته شهباز شريف ڪوري ڪيس ۾ نيب جي قيد ۾ رهي سگهي ٿو ته عمران خان ۽ عثمان بوزدار کي ڏوهه ثابت ٿيڻ تي گرفتار ڇو نه ڪيو ويو آهي؟، خسرو بختيار جي ڀاءُ کان پڇاڻو نه ٿيو ڇو ته وٽس ڪو سياسي عهدي ناهي، عمران خان ٻڌائي ته مريم نواز، حسن، حسين، سلمان شهباز ۽ يوسف عباس وٽ ڪهڙو سياسي عهدو هو؟ هن چيو ته شريف خاندان تي ڪوڙا ڪيس ڇو داخل ڪيا ويا، روزاني بنياد تي سندن ميڊيا ٽرائل ڇو ڪيو ويو، مريم نواز وٽ ڪهڙو سياسي عهدو هو جو کيس نيب جي قيد ۾ رکيو ويو. سندس چوڻ هو ته خسرو بختيار جي پنجاب جي ڪنهن به شگر مل کي جاچ ڪميشن ۾ ڇو شامل نه ڪيو ويو، خسرو بختيار جو سندس ڀاءُ جي ڪاروبار سان واسطو ناهي ته شهباز ريف جو سندس ٻارن جي ڪاروبار سان واسطو ڪيئن ٿئي ٿو. مريم اورنگزيب چيو ته شريف خاندان جون شگر ملون قانون موجب ڪم ڪنديون آهن، ايف بي آر هر سال سرٽيفڪيٽ ڏيندي آهي ته ڪرپشن ڪيئن ٿي آهي، شريف خاندان جي ڪنهن به مل هڪ ٽڪي جي به کنڊ ٻاهر نه موڪلي آهي، کنڊ ٻاهر موڪلڻ جو ثبوت پيش ڪيو وڃي.
